وعمري ما هاسكت يا بلدي

2007-03-20T16:07:00.000+02:00

((قبل))

----------------------------------

الفصل السادس
المدعي العام الاشتراكي
مادة179
يكون المدعي العام الاشتراكي مسئولا عن اتخاذ الإجراءات التي تكفل تأمين حقوق الشعب وسلامة المجتمع ونظامه السياسي، والحفاظ على المكاسب الاشتراكية والتزام السلوك الاشتراكي، ويحدد القانون اختصاصاته الأخرى، ويكون خاضعا لرقابة مجلس الشعب، وذلك كله على الوجه المبين في القانون

--------------------------------

((بعد))

--------------------------------

الفصل السادس
مكافحةالإرهاب
مادة179
تعمل الدولة على حماية الأمن والنظام العام في مواجهة أخطار الإرهاب، وينظم القانون أحكاما خاصة بإجراءات الاستدلال والتحقيق التي تقتضيها ضرورة مواجهة تلك الأخطار وذلك تحت رقابة من القضاء، وبحيث لا يحول دون تطبيق تلك الأحكام الإجراء المنصوص عليه في كل من الفقرة الأولى من المادة 41 والمادة 44 والفقرة الثانية من المادة 45 من الدستور.
ولرئيس الجمهورية أن يحيل أية جريمة من جرائم الإرهاب إلي أية جهة قضاء منصوص عليها من الدستور أو القانون

------------------------------------

مادة(41):
الحرية الشخصية حق طبيعى وهى مصونة لا تمس، وفيما عدا حالة التلبس لا يجوز القبض على أحد أو تفتيشه أو حبسه أو تقييد حريته بأى قيد أو منعه من التنقل إلا بأمر تستلزمه ضرورة التحقيق وصيانة أمن المجتمع، ويصدر هذا الأمر من القاضى المختص أو النيابة العامة، وذلك وفقا لأحكام القانون.

مادة(44):
للمساكن حرمة فلا يجوز دخولها ولا تفتيشها إلا بأمر قضائى مسبب وفقا لأحكام القانون.
مادة(45):
لحياة المواطنين الخاصة حرمة يحميها القانون. وللمراسلات البريدية والبرقية والمحادثات التليفونية وغيرها من وسائل الإتصال حرمة وسريتها مكفولة، ولا تجوز مصادرتها أو الإطلاع عليها أو رقابتها إلا بأمر قضائى مسبب ولمدة محددة ووفقا لأحكام القانون.

مش عارف ليه التعديلات الدستورية الحالية في (جمهورية مصر العربية) بتفكرني بالتعديلات الدستورية فى دولة (العراق) أثناء حكم صدام.

الشبه كبير أوي، والخوف يكون المستقبل واحد.

ليه بيقولوا العرب جرب؟!

2006-08-05T14:05:00.000+03:00

عشان فينا واحد زي ده
وده
ودول

أتفو

مصر بلدنا طالعه تنادى

2006-06-01T13:07:00.000+03:00

يبدو أننى تناسيت فى هوجة الأحداث السابقة أن هذه مدونة شخصية، وليست مسردة أحداث.

ولذلك فسأسمح لنفسى ان أحادث نفسى على صفحات هذه المدونة.

----------

عندى علم مصر متوسط الحجم، كنت لاقيته فى الشارع واقع ايام كأس افريقية ، وبما انى ناوى -ان شاء الله- اروح عند قسم قصر النيل، فقمت جايب العلم، وطلعت صباع روج وكتبت عليه ( حق الشرقاوي - حق مصر )

وعلقته على الدولاب على شان الروج ينشف وميبهتش على العلم أما يطبق.

طبعا الحاجة الوالدة شافت العلم متعلق على الدولاب بالى مكتوب عليه، وبما انها عارفه انى بنزل مظاهرات.. وبما انى الحيلة ووحيد تماما فبيتعملى حفلة مع كل مظاهرة اكون نازلها.

ولكن ما بيدها حيلة، لانى عودتها وعودت نفسى من حوالى 6 سنين، انى بعمل الى مقتنع بيه ، ومحدش بيقدر يثنينى عن الى عايزة.

لغايه كدا الموضوع تمام، هى شافت العلم وسكتت. النهارده الصبح لاقيتها بتصحينى من النوم ( ودا خرق صريح لحقوقى فى البيت يدل على ان هناك مصيبة ) طبعا قومت متحفز انى ازعق وادافع بشراسة عن حقوق النوم فى البيت بدون ما حد يصحينى.

لاقيت وشها مخطوف وبتقلى تعالى عايزاك، قلتلها ااااجى فين ؟ قالتى تعالى برة (ايقنت ان هناك شئ غير عادى) خرجت برة وقلتلها فى ايه.

لاقيتها بتقلى ان هى اتفرجت على برنامج رولا خارسا امبارح ( وكان بيتكلم على 11 شاب امن الدولة خطفتهم من البيت من قعدتهم على النت )

انا بقعد على النت حوالى 16 ساعه فى اليوم بس مش معنى كدا ابدا ان امن الدولة بياخدوا الى بيعدوا على النت كتير، قلتلها هاتى من الاااخر ، فى ايه ، قالتلى انا خايفة عليك ( طبعا الاسطوانة اياها هاتشتغل) انا ااستعديت للزمجرة لان مش على شان تكرر كلام انا عارفه تصحينى من النوم .

ولكن عبس وجهة أمى وإحساسي بوشوكها على البكاء اخرسني تماما.

قلتلها فى ايه ياماما ، امن الدولة مش بتاخد غير شباب الاخوان من بيوتها .

قالتلى لاء دول مش اخوان، وانت قولتلى ان فى ناس تعرفها محبوسة فى امن الدولة ( الكلام دا اما فرجتها على برنامج الجزيرة).

قلتلها طيب دول مش الى رولا خارسة بتتكلم عليهم .

بكت امى..

وقالت ان قلبها مقبوض تماما منذ البارحة ، وانى لو كنت بحبها فعلاً فمنزلش اروح المظاهرات ديه تانى واشيل علم مصر الى جوا دا.

مش عارف ليه ساعتها افتكرت الشرقاوي، وافتكرت جملة كنت قريتها على لسانه معناها ان ليه أمين ( مصر وأمه الحقيقية) ..

انا بقيت مش عارف اسمع كلام انهى أم فيهم، مصر ولا أمى.

من كام يوم قريت رد فى مدونة واحد ( مش فاكر اسمه ) بيقول انه أعتزل النضال والمظاهرات، وكان تبريره لاعتزاله، ان مصر ليها ابناء كتير اوى يحققولها احلامها، بس احلامه هو، ملهاش غيره.

رنت فى ودنى جمله مكتوبة فى شريط الأخبار فى مدونة http://x-ist.blogspot.com/ (( ولا عزاء للجبناء ))

مبقتش عارف ارد عليها اقلها ايه ..

سالتها وقلتلها يعنى ااقطع علم مصر الى جوا دا ومروحش المظاهره..

قالتلى اه. على شان خاطرى وعلى شان قلبي ميتوجعش عليك. (( مخدتش بالها من لفظة -أقطع))

انا قايلها قاصد، قلتلها ازاى يا ماما اقطع علم مصر، مصر ملهاش غيرى زى ما انتى ملكيش غيرى.

مش هاقدر اقعد فى حضنك هنا فى البيت، فى الوقت الى مصر بتنده فيه على ولادها الرجالة..

وانتى ولدتينى راجل يا ست الكل ..

وتركتها ودخلت ))

------------

ارفع راسك يا شرقاوي

واهتف بالصوت الحياني

مصر بلدنا طالعة تنادي

عالرجالة فى أرض بلادي

مصر بلدنا طالعة تنادي

عالكرامة فى أرض بلادي

-------------

انا جاى يا مصر النهاردة -ان شاء الله- على شان حق الشرقاوي وحقك وحقنا.

حقنا الى بقالنا كتير اوى اوى مش عارفين ناخده.

مش هاعد فى البيت أحسبن وادعى على الحكومة وسنين الحكومة وعلى حالنا وحال البلد وامصمص فشفايفى.

هانزل اقولهالهم فى وشهم

(كفااااايـــــــــــــة).

وربنا يسهل.

رسالة (من / إلى) محمد الشرقاوي

2006-05-27T23:57:00.000+03:00

رسالة من محمد الشرقاوي المخطوف يوم 25 مايو، والموجود حاليا

في زنزانة رقم 8-1 بسجن محكوم طره

رسالة إلى محمد الشرقاوي المخطوف يوم 25مايو، والموجود حاليا

فى زنزانة رقم 8-1 بسجن محكوم طره

*محمد يا شرقاوي*

عايز اقلك حاجه افهمها كويس أوى.
الى حصلك دا حصل لناس كتير اوى ملهاش فى السياسة ولا الكفاح.

أنت ممكن تكون ماشى فى الشارع فى حالك تماما، ضابط بتفتين على كتفة يرخم عليك وينده عليك بألفاظ بذيئة، دا بيحصل فى شباب كتير اوى..
أكيد أنت مش هاتقبل الشتمية وأى حد محترم فى الموقف دا هايبجح فى الضابط ومش بعيد يغلط فيه كمان.
.

ساعتها ممكن ياخدك يا شرقاوي ويلبسك أى حاجه من ورقة بنجو لقرش حشيش او حمل سلاح ابيض..ساعتها بكل سهولة ياخدك على القسم ويعمل فيك الى هو عايزة.
.

أى حاجه هو عايزها هايعملها فيك، من أول النفخ والكهرباء لغايه الأغتصاب والضرب بعصا على الخصيتين.
.

انت معرض فى البلد ديه للأهانة فى أى لحظة ، ومعرض انه يتعمل فيك الى أتعمل دا فى أى لحظة

(حتى وانت ماشى جنب الحيط)
.

فاما يحصل فيك الكلام دا فى سبيل قضية أنت مؤمن بيها وحق مهدور بتدافع عنه. ومش مجرد حق شخصي، ده حقنا كلنا، حقنا فى بلد حرة حيطانها مش مدهونة تزوير وتدليس وموالسة وإهانة كرامة ووساخة.

حقي وحقك.. حق أبوك وأبويا، أخويا الصغير وأخوك الصغير.
ابنى الى نفسي أخلفه فى بلد محترمه تحترمة ويكون ليه حقوق فيها، هو هو أبنك الى نفسك تخلفه فى مصر، بس مصر نضيفة، مش مصر مبارك.

محمد يا شرقاوي.

روح قول لابوك وأمك يا شرقاوي أنا بطل (أنا أرجل راجل فى رجالة مصر كلها).
.

أنت عظيم يا محمد.
فعلاً عظيم.

أما كلاب أمن الدولة.

فاحنا مش بنخاف احنا مش بنخاف احنا مش بنخاف احنا مش بنخاف احنا مش بنخاف احنا مش بنخاف احنا مش بنخاف احنا مش بنخاف احنا مش بنخاف احنا مش بنخاف احنا مش بنخاف احنا مش بنخاف احنا مش بنخاف يا ضباط أمن الكلب..
.

والمظاهره الجاية هاننزل كلنا برضوا، وأنت أما تطلع هاتنزل فى المظاهرة برضوا، وكلنا هاننزل..
.

شد حيلك يا أرجل راجل فينا كلنا.

-------------

تفاصيل وقفة القضاة 25/5--إعتقال الشرقاوي والشاعر

2006-05-26T08:06:00.000+03:00

تحديـــــــــــــــــث (2) :

قام أبناء الساقطات ضباط أمن الدولة وقسم قصر النيل بالتحرش الجنسي وهتك عرض محمد الشرقاوي.

يبدو أن النظام النجس مغلول ومعبئ من الشرقاوي .

أخذ الشرقاوي وكريم الشاعر خمسة عشر يومًا حبس (مرة أخرى) بعد تعذيبهم وضربهم فى جميع أجزاء جسدهم ضرب بشع جدا جدا.

رسالة بسيطة لأولاد العاهرات وأبناء الزوانى من ضباط الخوف والترويع ضباط أمن مبارك ..

نحن متظاهرين سلميين يا غجر ، بتعملوا ليه كدا فينا..

هؤلاء أبناء الوطن يا أبناء الحرام، فماذا تفعلون؟!!

عمومًا..

احنا مش بنخاف احنا مش بنخاف احنا مش بنخاف احنا مش بنخاف احنا مش بنخاف احنا مش بنخاف احنا مش بنخاف احنا مش بنخاف احنا مش بنخاف احنا مش بنخاف احنا مش بنخاف احنا مش بنخاف احنا مش بنخاف يا ضباط أمن الكلب..

والمظاهره الجاية هاننزل كلنا برضوا ، والشرقاوى اما يطلع هاينزل فى المظاهرات تانى ، انتوا فاكرين كدا انه هايبطل حرية ؟!

كتكم نيله فى تفكيركم الخرة . يا أولاد المتخلفيــــــــــــن.

-----------------

. تحديث (1) :

أتتنى أخبار بالقبض على الشرقاوي وكريم الشاعر الأن، ولكننى ارجح ان القبض تأديبى .

.
يبدو ان الفسل ابن الفسل الى الشرقاوى هزقة ومسح بكرامة اهله سيراميك نقابة الصحفين ، يثأر لكرامته .
عموما من المتوقع ان يُترك الشرقاوى ومن معه ..

بالأنتظار ..

.
---------------------------

تفاصيل اليوم:

التواجد شعبي ضعيف جدا .
.
ليس هذا ما كنتُ اتوقعه مطلقًا، الجهود المبذولة والإعداد لهذه الوقفة منذ أشهر، كنتُ أتمني معه وأتوقع حضور وتواجد شعبى كبير .
.

نفس الكردونات حول نقابة الصحفيين، الأعداد الغفيرة من جنود الشرطة بين مكافحة الشغب والأمن المركزى.

كالعادة وصلتُ متأخرًا وحاولت فى البداية الوقوف خارج الكردون على شان أشوف الدنيا فيها ايه .

هانخش منين وازاى.

كل دقيقة يجى لواء يقول بلاش وقفة هنا، انا اقوم متحرك خطوة ونص وواقف ، يجى لواء مكانة بلاش الوقفة ديه.

ومع تحركى فى أقصى اليمين وجدت امرأة ومعها فتاه يحاولون الدخول وسط جنود المن المركزى، لتقابلهم صرخة من أحد أمناء الشرطة (( عايزين تخشوااااااااا فييييييييين ))

قام جيه ظابط كدا بص للأمين دا بصة معناه ( اسكت يا ابن الكلب ) وقام قايلهم الدخول من الناحية التانيه.

انا سمعت الدخول من الناحية التانيه ديه وطرت على الناحيه التانيه لأجد وقبل الدخول ( انه دخول بلا خروج ).

فقد كانت نفر من المحاصرين داخل الكردون يحاولون الخروج ، ولكنهم لا يستطيعون ، من الاخر ، مسموح ليك الدخول ، ولكن بلا خروج .

انا دخلت وقعدنا نهتف بتاع ساعة وعند جلوسي قليلا كان بجانبي أحد صحفين النقابة، فتح نقاشًا مع حول ما يحدث.

وجهة نظرة تتلخص فى ان الى بيتعمل دا ملوش اى لازمه ، ورددتُ ردًا مفحمًا عليه أسكته .

عموما بعد قيامى لمواصلة الهتاف فوجئت بالشرقاوى أمامي، نزلت كى اسلم عليه وأهنئه بالخروج ، ولكنه كان مشغول فى استفزاز قوات الأمن كعادته ، حقيقة الشرقاوى رائع بكل ما فى الكلمة من معاني.

الشرقاوى كان واقف على الكردون وماسك ورقة مكتوب فيها (عايز حقى ) واسماء المعتلقين ، وتقريبا كان هناك احد الضباط ينظر للشرقاوي شذرًا ، فالقى عليه الشرقاوى كلمة يبدو انها ( من الى بتحرق الدم ) فالراجل بيقله انت بتقول ايه ..

فالشرقاوى قاله انت مبتسمعش ولا ايه ؟ ، وقعت على ودنك ..

انت اصلا متنفعش ظابط، شكلك مش شكل ظابط ، فالراجل بيتلفت حوالية ، فالشرقاوى قاله ايوااااااااا انت ، انا بكلمك انتتتتت .

انت متنفعش ظابط اصلاااااا . تلاقيك من بتوع الخمسين فى المية .

حقيقة كرامة هذا الظابط تحتاج للرثاء أمام نفسة قبل الرثاء أمام جنود الامن المركزى .

المهم حاولت الخروج مع كثيرين من الكردون ( كنت عايز اشتري سجاير ) فوجدت ان الخروج ممنوع تماما ، ولأننى متفهم ان الجنود دول طالع عين ابوهم زينا مع الحكومة الوسخة ديه ، قلتلهم فين الكلب الى قلكم متخرجوش حد ، احنا عارفين انكم غلابه وطالع عينكم زينا ..يبقا اندهولنا الضابط طيب ، اندهولنا الحيوان الى قالكم متخرجوش حد.. الجندي رد عليا بكل هدوء وقالى ، انا مقدرش أنده عليه ، قلتله ليه يعنى . هايضربك ، ابتسم وقالى مش بعيد والله..

المهم كان هناك الكثيرون يحاولون المرور من الكردون ولما اشتد الدفع من قبل المتظاهرين فى محاولة للخروج من الحصار تدخل احد الكلاب ( ضابط ) ورش سلف فى وش الناس الى كانت عايزه تخرج ..

رش سلف كميته كبيرة ، درجه انى كنت واقف بعيد عن الضابط بخمس ست بنأدمين ، ولكن السلف وصل إلى ، عموما أخذت الاخ المتظاهر الى لبس السلف فى وشه ، وحاولت ان اجلسه فى ظل ( لان الشمس مع السلف مش كويس خالص) ولكنه كان دائخًا وفى نفس الوقت مصر على الوقوف والهتاف ، حتى خارت قواه واقتنع بالجلوس فى الظل قليلا ..

تجولت فى الناحيه الاخرى لاجد الشرقاوى فى نفس وقفته ، ومعاه واحد اسمه هانى ..

هانى دا بقا ابوه لو كان زود دقيقتين كل يوم فى التربية ، كان حاله اتغير ..

لانه ولا شاف التربية فيديو ولا سمع عنها فى الراديو , الواد واقف عمال يشتم فى بتوع الامن المركزى ويسب ليهم الدين. جاى بهديه واقله دول مأمورين وطالع عين ابوهم زينا ، يقوم سابب الدين ليهم كمان مرة ..

فعلا فعلا سوفاج ، الحركة الوطنية بقت بتلم الايام ديه ..

الواد دا لو كانوا صوروه وهو عمال يشتم ويسب ويلعن ، كان بقا مظهر وسخ لينا كلنا ، لحركة كفاية وكل المتضامنين .

بس للاسف هو مش بيفهم ، ربنا من وسط النعم الى أنعم عليه بيها ، مكنش فيها نعمه العقل .

عمال يشتم ويسب .. والناس (منهم انا) نقوله عيب يابنى عيب يا بابا ، عيب يا خويا . وهو برضوا شغال سب..

المشكله انه بيشتم جندى يشبه باب اوضتك ، والجندى لو مسكة هايعمل منه فيلم الارض ، بس الغلبان معندوش امر بالالتحام ..

ياريت تبقوا تقولوا لهانى دا ( الإفترا وحش، وافتح كتاب -التربية- الى عمرك ما شفتو، الصفحة 512 ، هاتلاقى ان الى عملتوا دا عيب ، وسب الدين مش شطارة ..

ايضا كانت هناك اشتباكات طفيفة بين الاستاذ محمد عبد القدوس ، وبين جنود الامن المركزى حيث ، أمسك بعلم مصر وظل يخبط به على رؤوس جنود الأمن ( فى منظر اراه معبر بشكل رهيب، فمصر -الممثلة فى علم مصر- تطرق رأس الشرطة -الممثلة فى الجنود- كى يفتحوا للحرية الممثلة فينا) كى يفتحوا له، ولكن لا حياه لمن تنادى، عموما توجهتُ والأستاذ كمال ابو عيطة لتهدئة الاستاذ عبد القدوس ، وقد استجاب فورا.

حقيقة كل من تثور اعصابة من الحر والكردون المغلق وكان (يتعصب)، كنا نهدئة بكلمة ((دا جندى مش ذنبة حاجه ، الرك على الكلاب الى بيسموهم ضباط والى موقفينهم كدا والناس كلها فاهمة ، عدا الفسل الى اسمه هانى دا))

وكان كله بيهدى ..

مر القضاة أمامنا ليحيونا ، وقمنا بتحيتهم ، واجتمع المتظاهرون الهامدون من حرارة الشمس فى هتاف واحد . احنا معاكم يا قضاة فى اكثر اللحظات حماسة طوال الوقفة..

ذهبتُ لناحية الخروج مرة اخرى لاجد إمرأة فى عمر أمى ، حاولت الخروج فمنعها الجنود ، فتعصبت وحاولت زحزحتهم وأتى لها ضابط يقول لها ((فى ايه ))فقالتله ((افتح انا عايزة اخرج)) ، فقالها محدش هايطلع، المهم شدوا فى الكلام وهى شتمته ، كاد ان يشتمها ، ولكنه وجد للفور يد تجذبه للخلف ، وتقله أهدى ..

يبدو انه احد اللواءات وانهم لم يأخذوا اوامرهم بالضرب او الاعتقال .

عموما عدنا للهتاف مرة اخرى والساعه الثالثة إلا عشر دقائق تم فتح الكردون والسماح بالخروج( بعد ما الكلاب طلعوا عين الناس.

انا روحت لان الجو حر جداااا، والذهاب لضريح سعد غير ضرورى كوقفة القضاة.

دا الى حصل النهارده .

وتعليق اخر .

التواجد الجماهيرى كان زفت ..

خليك يا شعب نايم ..

خليــــــــــــــــــــــــك .

معادنا بكره

2006-05-24T18:55:00.000+03:00

*إن الله لا يغير ما بقوم حتى يغيروا ما بأنفسهم*

صدق الله العظيم

ربنا مش هايزيح عنكم غم مبارك وابنه إلا اما تنبع إرادة التغير من جوا كل واحد فيكم.

تـَـغــيـّـرُوا على شان تـُـغــيـِّـروا ..

يا نـــــــــــــاس .

بكرة الخميس 25/5 معادنا الساعة الواحدة والنصف ظهرًا أمام نادي القضاة.

الشعب كله هايقف وقفة احتجاجية على الى بيحصل

( موضوع القضاة واعتقال المعتصمين سلميًا وضرب الصحفيين ، والحوارات ديه كلها )

وهانطفى النور كلنــــــــــا من التاسعة إلى العاشرة مساءً .

احتجاجا على التعديل الدستوري البطيخي .

مرة واحدة بقا يا ناس نقف مع بعض ، مرة واحده.

الف لا لتلك المعارضه..

2006-05-10T09:39:00.000+03:00

هذا الكلام ليس ردا :) على احد بذاته ;) ...

في مقالي الماضي والذي ضايق كثيرين لسبب لا ادريه :) تحدثنا عن المعارضه بصفه عامه..عيوبها..واهدافها..

وبعد ان وضعنا ايدينا على المشكله في المره الماضيه سنحاول سويا ان نجد الحل..

وسأخذ حركة كفايه كمثال للمعارضه في هذا المقال حيث انها من المفترض ان تكون ممثله لكل تيارات المعارضه ...

في رأيي الشخصي ان المظاهرات والاعتصامات ما هي الا خطوه في الطريق والذي يجب ان ينتهي بالعصيان المدني لكي نستطيع ان نقول بقلب مطمئن ان المعارضه حققت اهدافها في مصر..ومن هنا يجب ان نكون قد حددنا هدفنا..ونبدأ في تحديد طريق الوصول اليه..

الخطوه الاولى ان يسألوا لماذا؟

حركة كفايه نجد انها تضم نخبه مثقفه وينتظرون من الشعب ان يتبعهم ولكن هذا تفكير خاطيء جدا..فمن المفترض ان تكون الحركه عباره عن الشعب يقوده نخبه مثقفه وهو ما سيؤدي الى تطور الحركه بالتأكيد..

وكيف نجذب الشعب للمعارضه..اتذكر دوما خشية الناس من المعارضه بصوت علني..والكثير من الناس حينما ترى المظاهرات والاعتصامات تتعجب من الكلام الذي يقال فيها من تنديدات بالحكومه والحاكم..لانهم بكل بساطه تربوا منذ صغرهم على ان الرئيس من المعصومين عن الخطأ...

ومن هنا يجب ان تبدأ كفايه..يجب ان تقام الندوات في المدن والقرى..يجب ان نعلم الناس حقوقهم وما لهم وما عليهم..يجب ان نعلمهم انهم مسلوبوا الحقوق في هذه البلد..يجب ان نعلمهم الا يخافوا من قول الحق..هذه نقطه...ويجب ان نصل للشباب في مصر..فهم اكبر نسبه من السكان في البلد..ويجب ان نصل اليهم في الجامعات حيث يختبرون الحريه للمره الاولى في حياتهم..يجب ان نصحح معلوماتهم عن المعارضه في مصر..

نصحح ما قام تليفزيون واعلام حكومي بزرعه في الادمغه عن المعارضه..وعن المظاهرات وما يحدث فيها..

الخطوه الثانيه ان يقولوا لا !...

هذا هو اهم ما يجب ان يتعلمه الشعب المصري..حرفان يستطيعان تغيير مستقبل امه بحالها ..

وبعد الخطوه الاولى وبعد ان نستطيع ان نعلم الشعب حقوقه (وهذا واجب على طبقة المثقفين بغض النظر عن انتماءاتهم) يجب ان ننتقل للخطوه التاليه..وهي ان نعلمه ان يطالب بها..ان نعلمه الا يخاف ...ان نجعل منه قوه مؤثره وفعاله...

الخطوه الثالثه العصيان المدني...

حلم صعب وخاصة في مصر ولكنه يجب ان يكون الهدف لحركات المعارضه ..وبه نستطيع ان نسقط حكومات..وربما الرئيس..اذا استطعنا تحقيق هذا الحلم فيمكننا ان نجمع الشعب حول هدف اخر ربما يكون اعادة بناء مصر..

ربما تبدو افكاري مختلطه وغير مرتبه ولكن للاسف انا امر بفتره ضيقة الوقت بسبب مشاغل الحياه لذا فارجوكم المعذره..

مليون نعم للمعارضة

2006-05-08T03:01:00.000+03:00

هذا الرد غير موجه لشخص بعينه، ولكنه موجه لمعارضين المعارضة أجمعهم.

فأن أفتح ثلاث مدونات متتالية، وأربع محادثات مسنجرية، ينقدون المعارضة وخصوصًا كفاية!

-----------------------------

أموت وأعرف الناس الى بتعارض المعارضة -امثال حركة كفاية- يواجهون أنفسم بأى وجه؟

يا فرحة أمك بيك وانت بتاكل سندوتش الطعمية وبتشرب الشاى وقاعد ورا الكمبيوتر بتنقد ليا فى حركة كفاية أو أى حركة تعارض مبارك الكلب.

انت قاعد فى بيتكم جنب امك وفى ناس تانيه بنات وشباب بيتنيلوا يتفحتوا فى الشوارع ويطلع ( ... ) الى خلفوهم ضرب وبهدله ، وفى الاخر تقولولى هى حركة كفاية بتعمل ايه؟

((يعنى ايه مظاهرات وأعتصامات؟ هى ديه الى هاتغير حال البلد.))

طب يا عم الجميل انت يا ابو دماغ كبيرة وفكر عالي ، نمسك ام سلاح ونمشى نطخ الضباط فى الشوارع، وساعتها تقولوا علينا ولاد كلب ارهابيين، وازاى نقتل مسلم ، وأننا مضللين فكريًا، ولينا جهنم وبئس المصير.

وتطلعونا اعداء ومش بعيد صهيونيين كفرة.

نعملكم ايه؟ بنتظاهر وبيتخطف مننا كل يوم خيرة شباب البلد، يعتقلوهم ويضربوهم. وانتوا بتتكلموا فى ان حركة المعارضة مش بتعمل حاجه.

يا ناس يا كدابين يا ولاد الكدابين، هو انتم شفتم مظاهرات سوى فى كتب التاريخ ونشرة أخبار بلاد برا؟

بينما حركة كفاية التى دفع نشطاءها ثمن حق التظاهر بالدم يوم الأربعاء الأسود.

فاكرين ولا افكركم .

يا شعب جبان بيشوف المظاهرات فى الدش، وكان مجرد الكلام على القهوة في السياسة فُجر، واسكت يابنى مش عايزين نتحبس ونعتقل ونتنيل.

الشباب الى مش عاجبكم معارضته ده، هوا الى طلع ( ... ) أبوه فى الاربعاء الاسود وأغتصبت البنات منهم، ومن نجت من الاغتصاب لم تنجوا من التحرش الجنسي والجسدي وتقطيع الهدوم والضرب بالجزم فى مناطق حساسة من أجسامهم.

وهؤلاء الشباب، هم من ضُرِبوا بالأسلحة البيضاء وبالعصيان، واتمرمطوا تحت أقدام الامن المركزي .

واضربوا من فرق الكراتيه ضرب لم تره مصر سوي مرات نادرة.

دول الى اتعمل فيهم كان بشع لدرجة أن العالم كله التفت لينا، وجت الإدارة الزفته الامريكية مكشرة عن أنيابها، وساعتها مبارك جاب ورا، وفك ايده عن الفشخ والبهدلة، وخرجت المظاهرات للشوارع براحتها.

وعملوا اعتصامات ، والضابط الى كان بيتكلم او يدايق متظاهرين، كان بيضرب ( عيني عينك ).

وطبعا لازم يضرب ويسكت او ميتنيلش يحتك بالمتظاهرين من الاصل ، لان الباشا معندوش أمر بالأشتباك . ولو رئيسه شاف خدش فى وشه، هايفلقه. هايقولوا جالك منين دا وانت مش معاك امر بالأشتباك .

هنا فقط خف النظام ايديه عن كفاية وعن المتظاهرين.

بدماء من سحلوا واعتقلوا واغتصبوا وضربوا واُهينوا.

أخذنا بعضًا من حريتنا، بعدما وضع هؤلاء الفتيه أجسادهم ليمرعليها قطار الحريات.

وانتوا يا حلوين يالى قاعدين فى حجر امهاتكم، تعترضون علي الشباب، وترغون بتفاهات عن (هما بيعملوا ايه؟) .

اه يا شعب وسخ مش معروفلكم مله.

أنتم مش مصرين ولا عمركم هاتكونوا مصريين، المصريين الى نعرفهم هما بتوع سعد زغلول ، الى ثاروا وقلبوا الشوارع ، ورجعوا سعد غصب عن عين اطخن طخين .

الشعب الى عمل ثورة اما الدعم أترفع، واجبروا السادات على اعادة الدعم، مش هو الشعب الى سكت على 75 قرش زيادة فى كيلو السكر .

مش أنتم شعبنا ما دمتم ساكتين على الى بيحصل فينا.

يا ناس أختشوا على دمكم ، وشوفوا البنات الى تم أعتقالهم النهاردة.

بنات زمانهم طالع ( ...) أبوهم بهدله وقلة كرامة فى أمن الدولة .

فاكر يا شعب اما واحده فلاحة الانجليز ضربوها بالنار، وثار الفلاحين، وحصلت دنشواي، راح الى راح شهيد.

بس قدامها اتشال المندوب الزفت البريطاني .

فى أمن الدولة حاليا تنتهك كرامة كل مصري.

هؤلاء الفتيات خرجوا ليعبروا عن شيئين ( مصر ، الشعب ) وها هم يُفعل بهم ما لا يعلمه سوى الله .

وكل يوم من دا ما دام الشعب جبان وخايف ، لاء، وكمان بيعترض علي الناس الى بتتمرمط في الشوارع ضرب وبهدلة ، وبيقولوا هما بيعملوا ايه.

يا سلام علي رجالة البلد فعلاً .

يا سلام.

وياريت تقروا الكلام دا يا شعب، ممكن تفهموا.

---------------------------------

الفصل الاول

(ان كنت وطني ..ساعدني كي أرحل عنك)

دخل علينا (الوالي) مختالا
بعدما رفعوا الستار
يحمل بيديه باقه من البرسيم
فكيف تنسم الحمقي بها عبق الازهار
وكيف اجتثت عيونهم
فلم يروا بين زواياها
الدمار
تقدم والفخر يملؤه
- يحمل الموت -
كأنما يحمل أكاليل الغار
وتنحنح ممثل يحمل علي صدره
بطاقه (السرور)
يهتز طربا ويقول
الجمهور (موافقون)

(منافقون مرغمون مضطهدون)

وقدم للوالي جواز المرور
ثم قال رفقا اولاد الأفاعي
ولا تشهدوا علينا بالحق
ففي مسرحنا
ندعوها شهاده زور
نحن لا نحرق الأشجار
بل نجتث البذور

(يجلس بجانبي مجند أسمر
يدون حتي البصقة بالدفتر
يكتب أني مختل العقل
مجنون اهذي, ام أسكر.؟
فالويل الويل لزمن الحق
وليحيا يحيا زمن العسكر)

الفصل الثاني

(يا فؤادي لا تسل أين الوطن..كان صرحاً من خيالٍ (فانهطل))

دخل عينا واحد من اولي (العزم)
واستهل صارخاً
الفساد بلغ الأعناق يا سادة

(صفق البلهاء في سعادة)

الفساد بلغ أعناقكم
ففتشوا عنه
وادفنوا عقولكم تحت الوساده

(صفق الحمقي بلا هوادة)

ولكن..
تذكروا..
القبلة لحذاء الطاغية..
عباده !!

-----------------

(يجلس بجانبي ضابط له ماللذئاب من وسامه
يكتب اني بالله صبئت , وكفرت بيوم القيامة
عذرا, اني مخطئ, هذا الظابط له اخلاق اليمامه
كم كان رحيما اذ كتب :
لا تذبحوا , يكفي ان تدقوا عظامه)
------------

الفصل الثالث

(أسالك الذهابا.. فالحاكم كل ربع قرن , يغادر الخرابا)

من الصف الامامي يتصاعد نباح الكلاب
والمتقون منزوون يئنون..
تبا !!
أيسمع طنين الذباب ؟

حجبوا عنا البطل
لظروف أمنيه
ألقي علينا البيان رجل (ممتاز)
يموء يموء بوحشيه
قال ان البطل متوضئ
لا يلمس الكلاب
ولا يجالس الرعيه
البطل مشغول
يخوض مع الكباري
معركه دمويه
البطل اله

أنتم.؟
فقاعه وهميه
البطل يؤدي دوره ( المبارك)
في ولايه امريكيه

( أرسلوا ملفي الي المأمور
فلم يدعني ويلا وثبورا وعظائم امور
كتب: هذا تلزمه حجه للسجن المعمور)

- ستار –

طار الرأس من فوق الجسد
وانفرطت مسبحه الامل
تناثرت الدماء بركانا
واخذوا القتيل
بذنب من قتل
ياقوم
متي عدتم جاهليين ؟
فعبدتم لاتا وعزي
وحاكما وهُبل
قدموا قرابينكم
فقريبا جدا
ستنبحون علي الطلل

-----------------------------------------
بقلم الشاعر:
محمد فوزي

لا للمعارضه

2006-05-06T08:18:00.000+03:00

لا للمعارضه دي

قلنا كتير واتكلمنا كتير ..وايه الحل..اذا كانت المعارضه نفسها خامله..مش بتحاول تدخل صفوف الناس وتفهمهم اي حاجه..سايبين الناس لوحه بيضا يرسم عليها القط واشباهه بمقالاتهم والتليفزيون ببرامجه اللي هما عايزينه..يبقى المشكله في مين؟في المعارضه ولا في الحكومه؟
كلامي وصل؟!
نبدأ من الاول..مين المعارضه في البلد دي؟الاخوان؟كفايه؟الاحزاب المعارضه؟طيب ماشي وبعدين..يعني بيعملوا ايه كل دول؟
مفيش غير الاخوان المسلمين اللي بينتشروا بين الناس وكل يوم بيزيدوا قوه ومش لانهم الاحسن او الافضل من ناحية المباديء (ويا ريت محدش يعتبر ان ده هجوم لان لسه الاخوان المسلمين ليهم مقال لوحدهم) وانما لان الاخوان المسلمين الاكثر تنظيما ..
نجاح الاخوان المسلمين في الانتخابات الاخيره كان لان الناس بتكره الوطني مش بتحب الاخوان المسلمين ..انا وملايين غيري صوتنا ضد الوطني ..مش للاخوان..
والاخوان مستغلوش النقطه دي..محاولوش يعرفوا الناس ايه هما الاخوان؟وايه مبادئهم..الاخوان حركه شبه مبهمه عن نسبه كبيره من الشعب المصري لدرجة ان بعضهم بيربطهم بالارهاب !!
سيبنا من احزاب المعارضه الشبه الميته زي التجمع والناصري والوفد ..الاحزاب اللي مالهاش شعبيه بين الناس ولا بتحاول انها تعمل شعبيه..
نيجي لحركة كفايه..الحركه بدأت بدايه مبشره جدا..مظاهرات و اعتصامات و و و..طيب وبعدين يا جماعه؟مش هنعدي المرحله دي؟يعني الواحد من دول يروح المظاهره يتضربله عصايتين من امن الدوله وبعدين يروح البيت وينام وقلبه مطمن انه شارك في المثيره الثوريه وانه في يوم ساعة العصاري في الروقان هيحكي لولاده عن اللي هو عمله في المظاهرات ...
حركة كفايه مكونه بشكل اساسي من المثقفين ودول للاسف مش فئه كبيره في البلد..فين اندماجكم مع الناس..فين تعريف الناس بيكم..فين المشاريع الخيريه والاجتماعيه والدعايه؟
مفيش حد بيحاول يوصل للشعب ليه؟فيه ناس لغاية دلوقتي معتقده ان المظاهرات اللي بيحصل فيها تكسير للمحلات والعربيات..جاهلين..انا معاكم في دي..بس للاسف معظم الشعب كده...طيب والحل؟
تغلغلوا في وسط الناس..بلاش نظام لا لمبارك وبعدين نروح البيت ننام..
لازم نحاول نوصل للشعب...

موعدنا مع الدستور الأربعاء القادم

2006-05-01T15:20:00.000+03:00

ها هو أحد الشرفاء الأخرين.

د. زكى سالم أحد محررين الدستور، أعتبره أحد الذين لا يحيدون عن الحق، كما أنه يمتاز بفكر تحليلي مُحنك.

راسلته عبر الإيميل منذ يومين وقصصت عليه بعض ما حدث من رجال الخوف والترويع المُطلق عليهم مجازًا رجال أمن، وسردت له بعضًا من أفعال حكومة العادلي الحكيمة. والتى بكل صدق يتخبطها الشيطان من المس.

وأمددته بالفيلم تصوير (وائل عباس) وبعض الصور.

وتمنيت منه فى نهاية الرسالة أن يتحدث عن هذا الموضوع فى الدستور.

وقد راسلني البارحة قائلاً:

______________

معك كل الحــق
وسأكتب عن ما حدث بالتأكيد
د. زكـى سـالم

______________

هكذا يا فاضلي أثبتوا لنا أن الصحافة لاتزال بخير على أيديكم، وتحيه إلى المرتزق (أسامة سرايا)، وله بلغة الشعب أقول.

"بص لعمامك فى الدستور بيعملوا ايه أيها الموالس".

تضامن مع المعتقلين فى الاعتصام السلمي و بلغ عن نفسك

2006-04-30T17:52:00.000+03:00

أخيرا الواحد لقى شيء حقيقي ممكن يقدمه، طول عمري زهقان وطهقان من الحكومة والى بتعلمه الحكومة

بصرخ بأعلى صوتي

" يا نااااااااااس انا مش حتة أرض

ولا عربية ولا رصيد فى البنك، أنا بنى أدم .

ازاى عايزين تورثوني!

جمال لو اتورثتله البلد ديه، مش مجرد توريث أرض، دول بيورثوه الشعب المصرى، واحنا أحرار يا خلق هو، انا مش هاتعامل معامله العربية او الشقة، ومش هاتورث.

ربنا أول ما خلق الإنسان، أول نعمة أنعم عليه بيها (الاختيار) حط أدم فى الجنة وقاله أختار بين التفاحة وبين الجنة كلها، وأدم أختار .

ازاى عايزين تسلبوني الحق دا، ازاى مش عايزني أختار.

انا هافضل اتكلم وعمري ما هاسكت يابلدي، وعلى شان كدا جيه الوقت الى اقدم فيه شيء حقيقي سواء لمطالبي الى بدافع عنها، او للناس الى ليها مطالب برضوا وبتدافع عنها .

الناس الى ليها مطالب وقعدت على الرصيف فى اعتصام سلمي على شان يحققولهم المطالب ديه، مطالبهم ان القضاء يبقا حر، القضاء أخر معاقل الديمقراطية الى ممكن نتمسك بيه، وصدقونى لو سقط، يبقا خلاص، خلاص بجد.

الناس ديه قبضوا عليهم على شان بيطالبو بحقهم، بيطالبوا بقضاء مستقل.

رجالة بحق وحقيق مخفوش، مش زى معظم رجالة بلدنا الى لابسين طرح وقاعدين فى بيتهوم خايفين حتى يتنفسوا.

بصوا يا ناس كدا كدا الواحد فى البلد ديه معرض للإهانة وقلة الكرامة بسبب اى حاجه، لو شكلك مش عاجب ضابط ممكن ياخدك ويلفقلك اى حاجه ويرميك فى الحبس او فى المعتقل، وممكن يهينك او يضربك، هى هى الإهانة..

اقصى حاجه هاتحصلك ايه؟، هاتموت، طيب ما كلنا هانموت.
بس فى فرق بين أنك تموت راجل وبين انك

تموت ........ .

عمومًا النائب العام طلب التحقيق مع كل المعتصمين أمام نادي القضاة.

اطلب من النائب العام التحقيق معك للاعتصام أمام نادي القضاة. ولو الشعب وقف وقفة راجل ومضى على الطلب دا، هاتبقا مصر كلها متهمة بالإعتصام السلمي أمام نادي القضاة، وساعتها ولا حسنى ولا ابنه ولا النائب العام ولا الحكومة كلها هايقدروا يحققوا مع الشعب . وهايكون قرار النائب العام باطل، لأنه قال حققوا مع المعتصمين، طيب احنا بنعترف أننا معتصمين، ومادام مش هايحققوا معانا يبقا لازم يفرج عن المعتقلين.

وحتى لو حبوا يحققوا معانا، مش هايعرفوا، هايحققوا مع 10 ألاف فرد!

وابقى سلملى على الرأى العام والصحافة ساعتها، من الأخر الموضوع دا احنا كسبانين فيه شمال يمين.

وعمومًا ده " بلاغ تضامن مع المعتقلين في الاعتصام السلمي " تضامن مع المعتقلين و بلغ عن نفسك

ده موقع "منال وعلاء" الى فيه التفاصيل. خش واكتب اسمك وبلغ عن نفسك تضامنًا مع الناس الى مسكهوم فى الاعتصام.

http://www.manalaa.net

وانا سبقتكم وكتبت اسمي هناك، أما نشوف الشعب دا ليه حكم فى البلد ديه، ولا محكوم علينا نفضل عبيد.

جزاة الى يحب مصر

2006-04-29T05:54:00.000+03:00

صور للفظائع التي ارتكبتها شرطة مبارك ضد المعتصمين سلميًا .

هذ هو المسئول عما حدث، فأقيلوه.

أعوذ بالله من ده رئيس ومن دى حكومه

2006-04-28T04:43:00.000+03:00

هذا الرد عبارة عن تعليق للأستاذ " ليو "، وقد كتبه كتعقيبًا على أخر ما نُشر فى المدونة.. ولتلخيص التعقيب للظرف الحالي، ولتوافق التعقيب مع ما يود الموقع قوله، رأيت -دون أخذ رأي كاتب الرد- أن أنشر هذا التعقيب كرد فى المدونة، متمنيًا ألا يُعارض كاتب الرد هذا الإجراء.

-----------------------------

أعوذ بالله من ده رئيس ومن دى حكومه

ومنا احنا كمان علشان احنا اللى خلّيناهم يعملوا فينا كل ده

مبارك وحكومته فجروا فعلاً

ماعادش فيه خطوط حمراء وماعادش فيه حتى محافظه على البرستيج والمظهر الخارجى أمام أوربا وأمريكا

غالبا لأن مبارك عارف إن مافيش حدّ هيتدخّل !!

أمريكا مش هتتدخّل ومش هتقول لمبارك تلت التلاته كام بعد ماصدّروا لهم بعبع الإخوان
وده ظهر من بعد انتهاء المرحله الأولى فى انتخابات مجلس الشعب واكتساح الإخوان

كان قبلها أمريكا بتضغط على مبارك لإجراء إصلاحات سياسيه حقيقيه وجت كونداليزا والحكومه كانت فى نصّ هدومها
لكن بعد المرحله الأولى وبعد مكالمة شارون ل بوش وتحذيره من إن الإخوان يحكموا مصر والمكالمه دى قالنّا عليها هيكل وأكّد عبدالوهاب المسيرى إن هيكل مابيقولش معلومه غير لما يكون متأكّد منها مليون فى الميّه
يعنى المكالمه دى حصلت

ومن بعدها أمريكا رفعت إيدها تماما عن مبارك وحكومته
طاحت الداخليه فى الناس واتقفّلت اللجان وبعد الانتخابات أجّلت انتخابات المحليات برضه علشان الإخوان مايجوش وأمريكا مافتحتش بقّها.

وبعدين استلموا القضاة

ودى بقى ذروة المواجهه اللى احنا فيها دلوقتى
ياإما هنعرف ناخد حقّنا بإيدينا ونقف مع القضاة ومانسيبش الحكومه تدبحهم
ياإما كلّنا خلاص فى الباى باى

ماحدّش هيقف معانا ولا هيساعدنا طول ما مبارك ماسك الإخوان والإرهاب حجّه وطول ماهو بينفّذ لهم اللى عايزينه
هاجم إيران يهاجم
ابعت سفير العراق يبعت
ماتتكلّمش مع حماس يروح مقاطعها هوّه ووزير خارجيته فى مهزله تانيه
و أى حاجه بعيد عن إنّه يدّى للشعب حقوقه مبارك بينفّذها
يبقى هيضغطوا عليه ليه ؟

البلد دى بتاعتنا احنا
آن الأوان ناخدها بقى
"leo"

--------------------------

اعتقال المعتصمين وضرب مستشار

2006-04-27T23:10:00.000+03:00

يخرب بيت الحكومة على بيت امن الدولة على بيت وزير الداخلية.
الناس معتصمين سلميًا قدام نادى القضاة، تقوم معتقلهم كلهم؟! ومحاصر نادى القضاة وتحاول تمنع الجمعية العمومية بتاعتهم!!، الجمعية العمومية للقضاة مرة واحدة !!!! دا فجر وبجاحة موردوش على وزير داخلية قبل كدا

وكمان الأغبية بتوع أمن الدولة يقوموا مقطعين علم مصر الى محطوط على سور نادى القضاة؟!! بصراحة تخلف وغباء ما بعده تخلف، ياعم حبيب العادلي، علم ظباطك المتخلفين ان فى عشرات الكاميرات بتلقط كل نفس على كل ضابط، يعنى تقطيعكم لعلم مصر، وسحل المتظاهرين فى الشوارع وفرق الكراتيه الى بتضرب فى الناس، كل دا متصور وفضيحكتكم هاتبقا بجلاجل، ومحدش هايسمى عليكم ، كل حاجه عملتوها متصورة، وضربكم للمعتصمين سلمياً متصور كمان، وابقى ورينا يا مبارك هاتقول ايه لسكوت كاربنتر او كونزاليزا ريز

صحيح الى خلاكم تخطفوا المستشار محمود حمزة

وتعتقلوه اول امبارح على شان بيدافع عن المعتصمين وانتهاك الشرطة لحرم نادى القضاة، يخليكم تعملوا اكتر من
كدا فى الغلابة ولاد الغلابة (الشعب).

ياناس فوقوا واصحوا بقا، فوقوا الله يكرمك ويكرم عيالكم الى هاياكلوا التراب فى المستقبل القريب، دا إن لقوا التراب كمان !

عموما لينا عودة مرة تانيه ف نفس الموضوع دا.

وموقتًا خدوا اللينك دا لتحميل فيديو أنتهاكات الشرطة وامن الدولة ضد المتظاهرين

http://216.86.150.60/videos/0/495166_2df08.wmv

والفيديو دا تصوير النشط وائل عباس صاحب موقع
http://www.misrdigital.tk

تحيا جمهورية مصر التوركتاتورية

2006-04-11T02:20:00.000+03:00

إن رضي الكاتب أن يكون مرة دجاجة، تعاشر الديوك..
أو تبيض أو تنام.
فاقرأ على الكتابة السلام. "نزار قباني"
-----------------------------
كنا خمسة أول الليلة وولعنا الخبور، وبعد ما عنينا سطرت والحشيشة طلعت هبو أصلى.. اتنين ادشملوا نامو وبقينا تلاتة..
واحد ساكت وواحد بيزاول نفسه، وأنا لوحدى، قلت انزل أحسن كنت عايز أعدى على صحابي في القهوة..
عديت ملاقيتش حد وبالصدفة عم حلمي لقطني وندهني، عم حلمي كان يعرف جدي أيام ما كانوا في السجـــ آءءء قصدي لما كانوا مع بعض في حرب 48 ، المهم ندهني " ولا يا عرفه".
أنا: عقبال ما فهمت إن في واحد بيندهني الراجل كان هايموت من كتر الندا.. أهلا أهلا أذيك يا عم (حلمي)
حلمي: إذيك يالا، عامل ايه واذي جدك
أنا: ياعم حلمي بقالي سنتين بقلك، انه مات، إشحال إنك حضرت الدفنه والعزا!
حلمي: طيب أقعد عايزك في موضوع، أنت مال عينيك حمرا كدا ليه يالا
أنا: أصلى عايز أنام.
حلمي: وأنا كل أما أشوفك تقلى عايز أنام؟!
أنا: لخص يا عمنا، عايز منى إيه ؟؟؟؟؟؟؟
حلمي: عايز أتكلم معاك في حوار أنفلونزا الطيور
أنا: أنت فاكرنا فى البيت بيتك ؟!!
حلمي: ياض افهم.أنا مربي معيز، مش غلط عليا يعنى ؟
أنا: ( ا7ه ) بقرارة نفسي، معيز مين يا عمنا، ديه طيور وديه حيوانات ؟!
حلمي : أمال محافظ القليوبية ليه أمر بإغلاق مزارع الخنازير!، ما ديه برضوا حيوانات
أنا: أصلها ممكن يجيلها المرض وتعدينا يا عم حلمي
حلمي : أنت عبيط ؟ أنا بسالك غلط عليا من الحكومة مش من المرض.
أنا: ....... !!
حلمي: يعنى زى ما الحكومة ما فشخت الفراخ ممكن تفشخ المعيز.
أنا: وهى فشخت الفراخ ؟!!!
حلمي: أنت مش عايش ولا إيه يالا، أكيد طول مابتعرف العيال اللي أنت ملموم عليهم دول عمرك ما هاتفلح، طيب دا أنا و جدك أيام ما كنا في (الليمان 440 ) السياسي بتاع مدينة السادات، كان في شباب اصغر منك بيجولنا، كانت مصر بخير..
أنا: إيه بس لزمه السيرة دي؟
حلمي: أنت لسه برضوا بتتكسف إن جدك كان معتقل؟
أنا : لا أبدًا كمل حوار الحكومة بس، ووطى صوتك شويه، أنت مش حمل أمن الدولة.
حلمي: طب اسمع يا حيله يمكن تفهم، العبارة من الأول إن الناس إبتدت تتخنق من الحكومة دي، حاكم إحنا شعب يحب التغيير، غيّرنا من دوله تابعه للحكم العثماني، لدولة ملكية، وزهقنا قولنا نغير، قمنا غيرنا من مملكه لجمهورية عربية، المشكلة إن في كل مرة ما بنغيرش غير الأعلام، ولا بنفهم يعنى إيه الكلمة ولا بنفهم إحنا عايزين منها إيه، المهم وصلنا لجمهورية..
ومن حوالى 25 سنة جيه واحد قرر من نفسه انه يغير نيابة عن الشعب، من جمهورية لـــ ..
أنا: أيوا أيوا لـــلأهرام ، عارف النكتة دي.
حلمي: نكتة ايه يا خروف.. قرر انه يحولها من جمهورية لديكتاتورية.
أنا: لا لا لا ، إحنا كدا هانتظط يا عم الحج، إحنا قاعدين على قهوة.
حلمي: اهو على الأقل تلاقى ناس بتفهم مش الهبل اللي أنت تعرفهم.. ياض إحنا بقالنا فترة ديكتاتورية فلازم يغيروا، يعنى نغير من ديكتاتورية لتوريثية.. فاهم ؟؟، وعلى فكرة، الفكرة دي من أفكار نفس الراجل، بس المرة دي معاه ابنه، وعايزين يسموها توركتاتورية ، خازوق كدا معتبر، يستاهل إن الشعب يلبسه.
أنا: زى سليمان الحلبي كدا؟!
حلمي: لا طبعًا .. سليمان الحلبي مات بطل.. لكن إحنا ها نعيش ونموت جبناء، حتى الشباب، يعنى أنت كل شويه تقلى وطى صوتك، وطى صوتك ، خايف من حاجه أنت مش عارفها.
أنا : من اللي بسمعه وشفته واللي حكتهولي أنت وجدي وأنا صغير.
حلمي: نفس الراجل وحشيته هما إللي بيفصلوا كل مرة خوازيق للشعب، والشعب يهتف باسمه في التلفزيون، هشتكنا وافشخنا يا ريس، ويا عالِم بكره هاتبقى إيه.. أنت ساكت ليه؟!! اهو دا اللي الشعب بيعمله كل يوم. نرجع لموضوعنا زى ما قلتلك التوريكتاتورية اللي جايه هايبقا شعارها " أنا ربكم الأعلى "، ما هو ده اللي فاضل.. والى مش عاجبهم الكلام دا فكروا يقولوا اللي محدش قادر يقوله ...
أنا: ودول بقا الى في امن الدولة
حلمي: معظمهم، وشعارهم اللي ما يشترى يتفرج.. حاول تفهم بقه.
أنا: حاولت وتعبت، واكتشفت إن أسعد ناس هما اللي مش فاهمين حاجه، هو أنت فاكرني بشرب ليه ؟!
حلمي : عندك حق، بس برضوا الفهم نعمة يعنى مينفعش نغمض عنينا عن كل حاجه..
العيال دول بقا قرفوا الحكومة والراجل والى تحتيه.. وابتدوا يفهّموا الناس اللي ليهم والى عليهم، ومن ساعه الانتخابات اللي بالى بالك، وبعديها انتكاسات مجلس الشعب.. الناس بدأت تتخنق، واتفتحت عيونهم حبتين، والسجون منفوخة ومفيش مكان لكل دول، فهايعملوا إيه؟ يغيروا أكيد عشان ريحتهم بقت تقرف.
أنا: إيه علاقة كل دا بانفلونزا المعيز بتاعتك ؟!
حلمي: أنا جايلك في الكلام اهو، المهم جات مصر أخدت زى ما بتاخد كل حاجه ، بس المرة دي اخدت كاس الأمم الأفريقية، والعالم هاجت والحريم اتعفئت في الشوارع، والعربيات أتكسرت، بزمتك مش دا هبل ؟
أكيد دي كانت البُشرى اللي خدها الراجل وابنه في التليفون من اللي بيبلغوه أخبار الشعب كل يوم.. تخيل الرجل قاعد على الكرسي، وجنبه إبنه على كرسي اصغر، وجاله التيفون:

الراجل: ألو ..
البصاص: أأآلو .. إذى معاليك يا ريس
الراجل : انجز ...
البصاص: تمام سعادتك ، الشعب أتهبل .
الراجل : تمام تمام ، خد ابنى معاك اهو ، على شان بدربه على الرد.
جمال : ألو ..
البصاص: آأألو .. إذى معاليك يا ريس
جمال : انجز ...
البصاص: تمام سعادتك ، الشعب أتهبل
جمال: تمام تمام

حلمي : وكان قرايب وصحاب اللي غرقوا في العبارة لسه ما استلموش جثث قرايبهم وعاملين عزاء..
ومصر كلها فرحانه في الشوارع ستات ورجالة، دا حتى التعداد ها يزيد قريب بسبب اليوم دا.
وهوب سمعوا عن حوار انفلونزا الطيور.
القهوجي: يالا يا عم حلمي أنت مش هاتصلي الفجر؟

حلمي: مش هاتيجى يابنى تصلى معايا
أنا: أصلـّى ازاى يا عم حلمي وبـُـقي كله طافيه (مع الاعتذار لشمس الزناتي)

يتبــع ..

كسوف الشمس أحسن من القمة البطيخية

2006-04-02T02:09:00.000+03:00

يزداد لدي الإيمان يومًا بعد يوم بعبط وهبل القمة العربية.
والحمد لله أتتنى بعض الاخبار التى وطدت بداخلى هذه الفكرة .
السيد المحترم محمد حسنى مبارك .
فضل مشاهدة كسوف الشمس على الذهاب إلى القمة العربية .
وعللت الصحف ما حدث بجملة ( أعتذر الرئيس لإنشغاله بالأمور الداخلية ) !

والحقيقة أن اللواء ( أحمد فتحى ) طيار الرئيس الشخصي ، ذهب إلى المطار إستعدادًا للتحليق بالرئيس نحو القمة العربية، وظل ينتظر دون أى إشعار بالذهاب من عدمه.
إلى أن عَـلِمَ أن الرئيس لن يذهب للقمة وسيذهب لمشاهدة كسوف الشمس.

هذا وليؤكد لنا رئيس دولتنا بما لا يقبل الشك أن القمة العربية هز كتاف على الفاضى.
كام ملك على كام رئيس جمهورية على كم مبعوث ، بيروح يهزها هناك ويعدوا يتنقلوا فى العربيات بتاعتهم ويوقفولنا المرور فى الشوارع .
وأهم كام صورة بياخدهم التليفزيون والصحف، ويقعدوا يتكلموا عن القمة ويصدعونا يومين إحنا والشعب العربي ، وياريته بفايدة.
وكام لقاء صحفى مع كام حاكم يتزاعوا فى التليفزيون بدل النسوان بتوع اللإعلانات ، على كام مليون جنيه يتصرفوا هنا وهناك . وكتر خيركم كدا .

والله الواحد مكسوف فعلاً أن هؤلاء الأشخاص هما حكام العرب .
بكل صدق وأمانة ، أنتم عار على العرب .
ورحوا زى حسني شوفوا كسوف الشمس ونفضوا للقمة احسنلكم واحسلنا من الصداع الى مبيجبش همه.

إنفلونزا الطيور وبتاع الحديد

2006-03-25T17:09:00.000+02:00

إيه علاقة أنفلونزا الطيور بالحديد؟

الحكاية من بدايتها أن صاحب اكبر شركات الحديد في مصر والشرق الأوسط ( احمد عز ) خلف عيل من زمان..
وطبعًا العيل كبر وبقى راجل، والحج احمد عز فرح وانبسط وقال ابنى لازم يشيل من بعدى ويمسك الحديد زى ما أنا ماسكه ( ولحد
دلوقتي مش عايز يسيبو ).
بس الواد قال لأ -شوف الديمقراطية- لن أعيش في جلباب أبي، وظل الواد ننوس عين أحمد عز فى الظلام.

وجائت أنفلونزا الطيور على طبق من ذهب لتكون الفرصة المثالية لظهور إمبراطور احتكاري أخر.
جائتنا الأنفلونزا بعد أن مرت على معظم دول العالم، والعجيب لم تفعل أي دوله مثلما فعلت مصر!
الفراخ بره بيتاخد المصاب منها أو إلى فيه شبهة إصابة ، وبتدفع الدولة تعويض يقارب ثمن الفرخة..
في أم الدنيا مصر الفراخ إلى في المحلات كانت بتتلم كلها سواء سليمة أو مصابة، ومظنش دا من خوفهم على الشعب المصري، لأن الناس ديه عمرها ما خافت علينا.

فأما تتاخد الفراخ عاطل على باطل والفرخة يدفعوا فيها 2 جنية فقط سواء كانت الفرخة كيلوا واحد او اتنين كيلوا.
يبقا لازم نفكر هو فيه إيه ؟، الناس ديه بترسم على إيه ؟
والفراخ المصابة قالوا ان هما أعدموها، مع إن الواحد مش واثق في مصانع لانشون الفراخ وكبري محلات الوجبات الجاهزة اللأيام ديه.

والفراخ السليمة محدش سمع عنها حاجه..
إلى أن ظهرت ثلاثة مجازر على مساحات مهولة في مدينة السادات لمالكها ( ابن أحمد عز ).
والقصة وضحت ، السليم بيروح عند ( ابن عز ) تمهيدًا لذبحها وتجميدها وإعادة طرحها في السوق .
وخرجت مظاهرة الفررجيه بأكثر من 1000 متظاهر فرارجى يمثلون 2.5 مليون عامل في صناعة اللحوم البيضاء..
وأرسل المتظاهرون مندوبين عنهم إلى منزل الباشا احمد عز بجلاله قدرة.

طبعًا لا أحتاج أن أقول أن المندوبين كانوا مواطنين من دائرة الباشا الانتخابية، ولكن احمد بيه عز رفض الخروج لهم وأرسل لهم الأعذار مع خدمه..
ونعم النائب الحق !

ولماذا نستغرب، أليس هذا النائب هو من وقف متحديًا شحنة الحديد القادمة من تركيا، والتي كانت ستصلنا بأقل من %50 من تكلفة الحديد في هذا الوقت.
ولكن كيف واحمد عز هو محتكر الحديد الذي وقف متحديًا مجلس الشعب أن يُتم الصفقة..
وبالفعل أذعن الكبار لرغبات البيه، وتم إيقاف استيراد شحنة الحديد، وفى المقابل رفع احمد عز تكلفة الحديد داخل مصر لأكثر من 150 % من تكلفته الحقيقية.
وإحنا لابسين طرابيش وقاعدين نتفرج على تجارة اللحمة البيضاء داخل مصر وهى بتروح لجيب ابن البيه.

وليتشرد 2.5 مليون عامل ولتجوع أسرهم ، ولتـُملأ القهاوي أكثر مما هي عليه.
وطوز فى كل ده مقابل سعادة ابن بتاع الحديد.
وخلينا احنا على القهوة بنلعب طولة وبنتفرج على ميلودى ومزيكا (فى قناة جديدة هتفتح قريب ، بس جامدة موت) ونتفرح على أفلام.

احتكار حديد واحتكار طيور .
ربنا يخلى لينا الخضار والديمقراطية .

وابقي سلملي على أعضاء مجلس الشعب إلى محدش راضى يقدم استجواب على إلى بيحصل دا.

زوجة رئيس الجمهورية "بالسواريه

2006-03-24T21:06:00.000+02:00

فلينتبه العالم الإسلامى..

هذه هى زوجة رئيس جمهورية مصر العربية القادم..

والواقفة على اليمين، هى الأم الفاضلة التى تولت تربية "خديجة" زوجة رئيس إحدى الدول الإسلامية المنتظر.

أرجوكم لا تنظروا إلى فستانها السواريه الذى يكشف قطاع عظيم من جسدها، فهذه هى ربه البيت الذى ناسب منه إبن الكرام "جمال مبارك"..

حقًا، دين وأخلاق وأم فاضلة..

فعز النسب.

دخول مصر موسوعة جينس للسلبيات

2006-03-24T12:15:00.001+02:00

مفيش حد فينا عاجبه الى بيحصل فى بلدنا -مجازًا خليها بلدنا- وكدا كفاية أوى سكوت.

الواحد قرب يفطس من كتر الهم والسلبيات. ومادام النشر الورقي مستحيل للكثير من الإعتبارات التخوفية والمادية والوسائطية.
فالنشر الإلكتروني هو الحل الوحيد.

احنا مجموعة شباب (محررون وتقنيون ورسامون) قائمون على تحرير الموقع.

مش هانسكت، هانتكلم ونتكلم..

هانكتب زى ما بنتكلم بينا وبين بعض، مفيش قيود، مفيش ممنوع، مفيش رقابة.

وأنتوا يا شباب مصر ورجالتها، عيب أوى أن كل واحد قافل بابه عليه، وكمان قافل بقه.

تعالوا معانا نصرخ بأعلى صوتنا، ما دامت الحكومة لسة موجودة بعد الجرائم الى ارتكبتها، ولو كنت ناسى أفكرك:

إرتكاب الأمن المصرى لمجازر الانتخابات الرئاسية بمساعدة بلطجية الحزب الوطني..

الأربعاء الأسود وضرب المتظاهرين..

تقطيع هدوم النساء المتظاهرات، أغتصاب بعض المتظاهرات وحتى الصحفيات ما عتقهومش.

فضائح الحكومة فى تعاملها مع متظاهرين "محرم بك" والتى اندلعت إمتعاضًا من "المسرحية القبطية".

ومحاكمة أيمن نور.

مذبحة ألاجئين السودانيين.

انفلونزا الطيور والإستعباط الحكومي.
العبارة المصرية وألف شهيد.

ومصايب تانية كتيرلسه هاتحصل، والشعب ما بين نائم وخائف وفاقد للأمل.

والحكومة حمقاء تخرج من حفرة لتقع فى حفرة أكبر وأضخم، تشعرك وكأنها حمقاء يتخبطها الشيطان من المس.

وأحنا مادام فينا لسان، فعمرنا ما هانسكت..

همتكم معانا نصرخ فى وش النظام الحاكم ونقلهم إن البلد ديه مش عزبة أبوهم، ومحناش عبيد عند الى خلفوهم.